ЗАР
Салмонела нянгаар үүсгэгдсэн хоолны хордлогын дэгдэлт болох нь тогтоогдов
Эрүүл мэндийн газрын ойн баяр “Даян хаан” зоогийн газарт зохион байгуулагдаж хүлээн авалтад орсон хүмүүст хордлогын шинж тэмдэгтэй эмнэлэгт хүргэгдсэн. МХГ-аас “Даян хаан” зоогийн газарт хяналт шалгалтыг хийж, хүлээн авалтад хэрэглээд үлдсэн хоолны дээж, хүнсний түүхий эд материал, унд ахуйн ус, орчны арчдас, мөн хүнсний түүхий эд бүтээгдэхүүнийг худалдаалж байсан Цогжавхлан, Наран супермаркетаас хүнсний бүтээгдэхүүний дээж, нийт 28 нэр төрлийн сорьцийг МХГ-ын Сорилтын лаборатори болон Мал эмнэлэг ариун цэврийн лабораторид шинжлүүлжээ. Шинжилгээний дүнгээр тухайн хүлээн авалтад бэлтгэсэн зууш, 2-р хоол, мөн үлдэгдэл тахианы мах, өндөг, хиам, гахайн утсан мах зэрэг бүтээгдэхүүнээс гэдэсний бүлгийн эмгэг төрөгч нян /Salmonella/, мөн өвчтөнүүдээс авсан шинжилгээгээр тухайн хоолны хордлого үүсгэгч нян илэрч, Салмонела нянгаар үүсгэгдсэн хоолны хордлогын дэгдэлт болох нь тогтоогдов. Даланзадгад сумын 3 Өрхийн эрүүл мэндийн төв, Зоонозын өвчин судлалын төвөөс халдварын голомт, өвчилсөн хүний гэрээр халдваргүйтгэлийг хийж, зөвлөгөө зөвлөмж өгөх ажил үргэлжилж байна. Мэргэжлийн хяналтын газрын Эрүүл ахуй халдвар хяналтын байцаагч, Эмчилгээний чанарын хяналтын улсын байцаагчид БОЭТ-ийн халдвартын тасаг болон шинээр дэлгэсэн тасагт халдвар хамгааллын дэглэм хангуулах, эмчилгээ, оношилгооны чанарт хяналт тавин, зөвлөгөө зөвлөмжөөр хангаж ажиллаж байна.
Хоол хүнсээр дамжих өвчнөөс сэргийлэх, олон нийтийн хүлээн авалт зохион байгуулахад анхаарах асуудлаар улсын байцаагчийн зөвлөмж боловсруулан нийтийн хоолны газрууд, хүнсний бөөний төвүүдэд хүргүүлэн, хяналт, зөвлөн туслах үйлчилгээг хийж байна.
“Даян хаан” зоогийн газар нь байнгын үйл ажиллагаа явуулдаггүй гэсэн шалтгаанаар тѳлѳвлѳгѳѳт шалгалтад хамрагдаж байгаагүй байна. Одоогоор үйл ажиллагааг зогсоон, 1928000149 дугаар бүхий зөрчлийн хэрэг нээж, зөрчил шалган шийдвэрлэх үйл ажиллагааг үргэлжлүүлэн хийж байна. Мөн хүлээн авалтаар хэрэглэх хүнсний түүхий эд бүтээгдэхүүнийг худалдан авсан Цогжавхлан, Наран супермаркетуудад хяналт шалгалтын ажил үргэлжлэн хийгдэж байна гэж аймгийн МХГ-аас мэдээллээ
Санал болгох
