Өмнөговь аймгийн хэмжээнд гарч байгаа зам тээврийн ослын 50% нь нүүрс тээврийн зам дээр гарч байна.

Өмнөговь аймгийн Таван толгойн уурхайгаас Гашуун сухайт хилийн боомт хүртэлх Нүүрс тээвэрт 12000 жолооч, тээврийн хэрэгсэл бүртгэлтэй явж байгаа гэсэн хамгийн сүүлийн үеийн албан мэдээлэл байдаг.Нүүрс тээврийн энэ замд өдөр шөнөгүй нааш цааш зорчих жолооч нарт хамгийн тулгамдсан асуудал бол нүүрсний замд тээвэр хийх үеийн хөдөлгөөний аюулгүй байдал юм.
“Нүүрсний замд осол аваар гарчээ” гэдэг яриа байдаг л нэг зүйл мэт сонсогдож, ачсан нүүрстэйгээ замын хажуу руу онхолдож ойчсон машин ердийн л дүр зураг мэт харагдаж, “базсан цаас” шиг болтлоо мөргөлдсөн том машин энгийн л үзэгдэл мэт тааралдаж, эрдэнэт хүний амь нас ослоор эндэх нь цочирдом мэдээ биш болтлоо энэ замыг дагасан хар бараан сүүдэр даанч их байгаа нь харамсмаар...

Өглөө тээвэртээ явсан жолооч эсэн мэнд эргэж ирнэ гэсэн баталгаа байхгүй ийм л аюултай замаар ар гэр амьдралынхаа төлөө хэдэн зуун жолооч нар энэ замыг түшиж аж амьдралаа залгуулж явна.Өмнөговь аймагт гарч байгаа Зам тээврийн ослын 50% нь нүүрс тээврийн замд гарсан байна.
Нүүрсний зам дээр гарч байгаа осол аваарын дийлэнх нь замын эвдрэл гэмтэл түүнчлэн жолоочийн анхаарал болгоомжгүй байдал гэрлээ шилжүүлдэггүй, хурд хэтрүүлдэг зэргээс гардаг гэнэ.Иймээс жолооч нар осол аваарын гол шалтгаан болсон замаа засаачээ гэдэг шаардлагыг тавьсаар байна. Жолооч нар нүүрсний замыг сайн засах, давхар замтай болгох юм бол осол аваар гарахгүй гэж үзэж байна. Учир нь эвдрэлийг тойрч, замын өө гаргах гэж явдагаас осол их гарч байна гэж тэд үзэж байгаа юм.

Амь нас ямар ч баталгаагүй, хэзээ ч аваар осол тохиолдож мэдэх замд олон үрсийн аавууд, амьдралынхаа төлөө зүтгэж яваа эрчүүд, эх орны ирээдүй болсон залуус өдөр шөнө, өвөл зуныг үл хайхран хүнд даацын машины жолооны ард алтан шар замдаа сүслэж, аяншиж, сайн муу нэр зүүж, эр зориг, тэвчээр хатуужлаар эгэл амьдралынхаа төлөө зүтгэж явна.
Нүүрс тээврийн замд жолоо мушгиж буй нутаг нутгийн олон мянган залуучууд төдийгүй эмэгтэйчүүд ч байна. Дүрэм журмаа ягштал барьж, тээврийн хэрэгслийнхээ бүрэн бүтэн байдлыг хангаж, замын хөдөлгөөний аюулгүй байдлыг мөрдөн ажиллаж байгаа олон шилдэг жолооч нар ч бий. Гэсэн ч олны олонд зарим нэг нь архи ууж, хурд хэтрүүлж, гэрлээ шилжүүлэхгүй, анхаарал болгоомжгүй зорчдог зэрэг зөрчил гаргадаг гэдгийг ч жолооч нар нуусангүй ээ.

Нүүрс тээврийн замыг дагасан олон асуудлууд шил шилээ даган овоорсоор байгаа хэдий ч нөхцөл байдал улам хүндэрсээр. Төр засгийн сайд дарга нар ирж бодит байдалтай танилцаад буцдаг ч дорвитой өөрчлөгдсөн зүйл байхгүй байгаад жолооч нарын итгэл цөхөрчээ.Монгол орныхоо эдийн засгийг ар гэр амьдралтай хамт нуруундаа үүрч яваа жолооч нарын үүрэг хариуцлага асар өндөр байдаг ч тэдний эрх ашигт төрийн бодлого зохицуулалт үгүйлэгдсээр.скачать dle 12.0